Dütt un datt up Platt

Prost Neejohr

„De Tied de loppt und loppt, bliwt nich bestahn, musst jümmer mit de Tied mitgahn.“ Dat ole Johr is Erinnerung worn.

„Wat west is, is nu vörbi, dor kannst nix mehr maken, wat kummt dat weet man nie, dan Ogenblick mutt man anfaten.“ „Jeden Dag in dien Leeben, giwt nur eenmal up de Welt, Tied so is dat eben, kannst nich köpen vör dien Geld.“

Fröher hebbt de Lüd to de Tied twischen Wihnachten und Heiligen drei Könige, „Heiligen Nächte“ seggt. Bi de Germanen, is denn de Helljäger, oder ok Wotan, mit sien Schimmelgespann, denn in de Wulken öwert Land trocken. Keen Wäsche dörf man buten uphängen, süß ward dat een Dodenlaken. All de Ackergeräte de nich in Hoff in Schuppen brocht wörn, dor güng de Helljäger röber, de könnst in nee’n Johr nich gebruken. Bruktum wat noch vör 50 Johr in manchen Dörper genau beacht wör.

De „Heiligen Nächte“ wärn ok wichtig vör dat Wäder. Noch hüt giwt dat Lüüd, de dat upschriewt. Jeder von de 12 Dag bedüt een Monat in Johr, anfangt mit Wihnachtsdag. So wie dat Wäder denn is, ward dat Wäder dan jeweiligen Monat. Ik weet eenen Spruch de ümmmer stimmt: „Wenn‘’t Silvester stürmt und weiht, dat nee’e Johr vör de Döör denn steiht.“ De Tied is je ganz wat Besonderes, de kannst du nich sehn, nich hören, nich anfaten nich rücken und vör allen Dingen nich anholen. Bestimmen kann man nur dan Ogenblick! Bi Schnega giwt dat je dat Steendenkmal, dat uns zeigt, wie öwer Johrdusende Steen von Norwegen bet na uns in de Iis-Tied schaben sind. In de Beschriebung öwer unsere Erdgeschichte läst wie door, wenn man de Erdgeschichte mit eenen Johr vergliekt, wie kott uns Leeben is:

De Erd sall vör 4,5 Milliarden Johr entstahn hem. Een Zahl de man sik gornich vörstelln kann. Up een Johr verglecken, hett dat von Januar bet April keene Lebewäsen up de Erd gäben. Bet Oktober gäw dat bloß Einzeller. Am 25. November kömen de eersten Wirbeltiere, Schwämme und Korallen. 6 Dag dornah fangt dat Läben up’n Land an, eerst de Planten, denn de Deere. In de 1.Dezemberwoch entwickeln sik de Wälder. 14 Daag löter gäw dat denn Säugetiere und Ur-Vagels. De letzte Dezemberwoch sind de Alpen entstahn. Am Silesterabend de eersten Minschen. Üm 23.55 Uhr malt de Steentiedminschen Biller in Felsen. Een halbe Minut vör twölf ward de Königsgräber von Hassel uppstellt und Pyramiden bout.. Seit 1/3 Sekunde vör twölf giwt dat de Bundesrepublik.

Poor Sprüch vör dat nee’e Johr:

„Wie rasch doch de Tied vergeiht, wedder is nu een Johr vörbi, dat nee’e vör uns steiht und jeder will gern weeten wie dat in nee’n Johr wiedergeiht.“ „Stell dik nich glieks de Frag, wie et wiedergahn sall morgen, een jeder Minsch hett seine Plag, een jeder sien Sorgen.“ „Bewohr as Schatz wenn’t geiht, und süht dat ok ok trübe, de Hoffnung und Tofreedenheit, eenen fasten Globen und de Liebe.“ „Positiv denken, sik sülmst eene Tokunft gäben, anderen Freude schenken is Balsam för’t Leeben!“ „Wer nich nutzt dan Ogenblick, ümmer is an klagen, öwer alles argert sik, dessen Tokunft is schon begraben.“ „Eenen Rat kann ick noch gäben und fallt dat ok oft schwor, wees ok mal be’t mehr tofreeden, und bliewt gesund in nee’n Johr.“

Von Carl Friedrich Bautsch

Das könnte Sie auch interessieren

Kommentare